Tamil Kavithaigal | தமிழ் கவிதைகள்

எட்டாத காதல் இனிக்கிறது

Kaathal
Ettatha Kaathal


எட்டாத காதல் 
எள்ளவும் திகட்டுவதில்லை 
ஏனோ தெரியவில்லை 
எட்டாத காதல் 
என்றுமே இனிக்கிறது !
ஏனோ தெரியவில்லை

என்றென்றும் சொல்லும்
எல்லா பொய்யினிலே 
எல்லாமே தெரிகிறது
எட்டாத காதல் 
ஏன் இனிக்கிறது என்று! 

வியர்வையும் கண்ணீரும்

வியர்வையும்  கண்ணீரும்


கவலைகள் எல்லாம் வியர்வையாக!
காதல் நினைவு கண்ணீராக!
அவளை மறக்க நினைக்கையில் 
இடைவேளை எடுக்க வில்லை 
வியர்வையும்  கண்ணீரும்!

சின்ன வீடு

Chinna Veedu
Chinna Veedu


மலர் மாலை மாற்றாமல் 
மண வாழ்க்கை காண துடிக்குது  
எழுதிய கவிதைகள் எல்லாம்! 

இரவு நேரத்து இசைகள்

இரவு நேரத்து இசைகள்
இரவு நேரத்து இசைகள்


இரவில் எழுப்பி விடும் 
இசைகள் சுகமாய் செய்கிறது 
கணக்கில்லா இம்சைகளை !

பாதங்கள் இல்லா ராகங்கள்
பறந்து வருவதில் ஆச்சர்யமில்லை!
ஒற்றை சிறகும் இல்லாமல்
பறந்து வருவதுதான் ஆச்சர்யம் !

மனித குயில்கள் இசை அலையில்
மயங்காமல் தவழ்ந்து வரும்
மனித செவிகள் அதில் மயங்கும்
விழி திறந்து மயங்குதல் ஆச்சர்யம்!

வாழை மடல் ஏறிய பாதங்கள்
வழுக்கி விழுதல் இயல்பு நிலை
இதய குழலில் படிந்த இசைகள்
தாலாட்டு பாடுவது ஆச்சர்யம்!

சொல்லாத காதல் எல்லாம்
இரவில் சுக இம்சைகள் புரியும்
மீண்டும் மீண்டும் கேட்ட பாடல்
சுக இம்சை புரிவது ஆச்சர்யம்!

இரவுகள் நீடித்தால் பல காதல்கள்
தன முழுமை நிலை அடைந்து விடும்
இரவு நேரத்து இசை கேட்டும் - நாம் எல்லோரும்
கவிஞன் ஆகாதது ஆச்சர்யமே!




இந்த நாள் இனிய நாள்

இந்த நாள் இனிய நாள்
இந்த நாள் இனிய நாள்


பாதங்கள் இல்லா இரவுகள் 
மெதுவாய் நடை போட
பாதங்களை மடக்கி 
மவுனமாக சிரித்தேன்!
உன்னால் - இந்த நாள் இனிய நாள்!

கடந்து போன நேரங்களை 
அருகே பிடித்து அமர வைத்து 
ஆணி அடித்து இருக்கச் செய்தாய்!
உன் நினைவுகளை மலர செய்தாய்!

இதழ் திறந்து இடை விடாமல் நீ பேச 
இதயம் திறந்து  இடை விடாமல் நான் பேச 
உன் மொழி நான் புரிந்தேன் 
என் மொழி பேச்சு மெதுவாய் நீ புரிவாய்!

இரு சக்கர வாகனத்தில் பயணித்து 
இரண்டு துருவத்தையும் தொட்ட உணர்வு 
இருந்தும் கேட்டுக் கொண்டேன் 
இவ்வளவு நேரம் வாகனத்திலா பயணித்தோம்?

அருகே அமர்ந்து இலக்குகள் இல்லா 
இடைவிடா பயணம் உன்னோடு!
எதிர் காற்று முகத்தில் மோத 
உன் இதயத்தின் அரணாய் என் இதயம்!
உன் இதயம் பின்னே ! என் இதயம் முன்னே!

நியாபக மறதி நான் அறிவேன் 
மயக்க நிலையும் நான் அறிவேன் 
காதல் நட்பு நிலையும் அறிவேன் - ஆனால் 
நம் நிலை நான் அறியேன்!

களங்கமில்லா இதயத்தோடும் பேசுகிறாய் 
சிந்தித்து மூளையோடும் பேசுகிறாய் 
உன் முழு குழப்பமாய் நான் இருக்க 
உன் இதயம் பேசினால் உன் இதழுக்கு தண்டனை!

எதிர்பார்த்து தேடிய முடிவிலி அன்பு 
கரம் தொட்டதாய் உணர்ந்தேன் 
கரம் தொட வேண்டும் என்றேன் 
இதயமும் இதழும் சேர்த்து முறைத்தாய்!

எங்கு சென்று முறையிடுவேன்
உன்னைத் தவிர எவர் உண்டு 
தவறுதலாய் வேண்டுகோள் இட்டேன் 
வந்த கவிதைகள் எல்லாம் ஓடி விட்டன 
கவிதை இல்லா வெற்றுக் காகிதமாய் நான்!

எதில்தான் கவிதை இல்லை 
உன் மூச்சிலும் உண்டு பேச்சிலும் உண்டு
என் இதயம் நிரம்ப கவிதையாய் நீ இருக்க 
வெற்று காகிதமாய் நான் இல்லை 
என் இதயம் முழுக்க கனத்த கவிதையாய் நீ!

கடந்து போன அந்த நாள், என் இனிய நாள்!
இல்லை! இல்லை! நம் இனிய நாள்!




ஒட்டு

ஒட்டு
ஒட்டு

சில நொடியில் தன் நிலை மறந்து 
விரல் நுனியில் உயிர் தனை இழந்து 
ஓட்டு போடும் அடையாள மை 
ஒவ்வொரு குடி மகனின் தலை எழுத்து!

ஒரு ஒட்டு என்ன மாற்றம் செய்யும் 
என்றொரு சிந்தனை வந்தால்...
சில துளி பெரு வெள்ளம் 
கரை புரளும் ஆறு, கடல் அதற்கு சாட்சி!

அரசியல்வாதி என்று ஒரு பெயர் கொண்டு 
மேடைக்கு மேடை தினம் ஒரு பொய் 
வெள்ளை வேஷ்டி வெள்ளை சட்டை 
உண்மைக்கு அல்லவா உகந்தது?

சரியான வாக்கு நாம் அளித்தால் 
கண் எதிரே பொய் பேச்சு 
கண் தெரியாமலே போகும்
அக கண் தெரிந்து வாக்கு அளியுங்கள்!

ஜனங்களின் நாயகனாய் ஜனநாயகம் 
உங்கள் வாக்கு  உங்கள் உரிமை
பணங்களின் நாயகனாய் பணநாயகம் 
விலை போன வாக்கா உங்கள் உரிமை ?

தொகுதியின் வேட்பாளர் அலசல் 
நிச்சயம் ஒரு தொலைநோக்கு பார்வை
ஊழல் ரவுடியிசம் மூளை அறியும் 
சேவை மனம்  எது வென்று புரியும்!

நாடும் வீடும் சுக நலம் பெற 
சின்னம் மட்டும் விழி நோக்காது 
சிந்தனை சொல்லும் ஒரு தெளிவில் 
உண்மையாய் உணர்வாய் வாக்களிப்போம்!

ஜெய்ஹிந்த்!...




இதழ் திறந்த பூக்கள்

இதழ் திறந்த பூக்கள்
இதழ் திறந்த பூக்கள்


இதழ் கண்ட மொட்டுக்கள் 
இதழ் திறந்து 
பூவிதழாய் மலர்ந்தனவோ ?

அன்னையர் தின கவிதை

அன்னையர் தின கவிதை
அன்னையர் தின கவிதை


உலக அகராதிகள் பாசம் என்றால்
உன் பெயரை முதலில் பொழியும்
உயிரைப் பிரித்து இன்னொரு உயிராய்
உலகிற்கும் உறவிற்கும் கை கொடுப்பாய்!

உனக்கென்ன தனியாய் ஓர் சிந்தனை
உன் மனதை ஆட் கொண்டிருக்காது
உன் உறவைத் தவிர ஓர் சிந்தனை
உன் மனதில் துளியும் இருக்காது!

உன் முன்னுரையும் முடிவுரையும்
உறுதியாய் சொல்லலாம் உனக்கானதல்ல
உறுதியாய் சொல்லும் அனைத்தும்
உனது உறவை உறுதியாய் நிலை நிறுத்தும்!

நல்வார்த்தை நிதமும் நீ தருவாய்
உன் வேதனை ஏனோ தினம் மறப்பாய்
என் உள்ளம் மெலிய நிலை நேர்ந்தால்
உன் உயிரையும் விட்டு மீட்டிடுவாய்!

உலகில் மலர்ந்த பூக்கள் எல்லாம்
உயிர் இழப்பது மாலையோ பூமாலையோ
உயிராய் பிறந்து அன்னையாய் மலர்ந்து
வாடாத பூவாய் என் அன்னையாய்
என் குல தெய்வமாய் நீயே ஆவாய்!


அன்னையர் தின நல் வாழ்த்துக்கள்..!




உயிர் பெற்ற பூக்கள்

உயிர் பெற்ற பூக்கள்
உயிர் பெற்ற பூக்கள்


மாலையில் உயிர் விட்ட பூக்கள் 
பூமாலையில் உயிர் பெற்றன 
கோயில் சிலையில் பூமாலைகள்!

எல்லை அது இல்லை

எல்லை அது இல்லை
எல்லை அது இல்லை


மொட்டுக்களை இதழ் உறிஞ்ச
மொட்டுகளுக்கு இனிக்கிறது 
இதழுக்கு வலிக்கிறது!

முனகல்களில்  சுக வலி அறிந்து 
முறித்து விட முயற்சிக்க 
கரங்களோ தலை கோதுகிறது!

இடம் மாறும் இதழுக்கு
இடைவெளி சிறு தாண்டி
இன்னும் ஓர் மொட்டு மலர்கிறது!

மெலியாத இயல்பான சிறிய இடையை
விரல் நுனி விழி கொண்டு
உற்று நோக்கி தழுவுகிறது!

வியர்வை ஈரத்தில் இதழ் நழுவ
இன்னும் சுக தேடுதல்
அவள் ஒரு தொடர் கதையாய்!

பூக்களின் நுனியில் மொட்டுக்கள் 
பூமேனியில் இது அதிசயம் - ஆதலால் 
எல்லை தவுறுதல் சாத்தியம்!

எல்லை அது இல்லை!...!..!




வானத்து நிலா

வானத்து நிலா
வானத்து நிலா

மழை முத்தமிட்டோ 
வெயில் கோபப்பட்டோ  
வானத்து வீட்டில் 
தொங்கும் வெள்ளியொன்று 
கருத்து விட்டது!


காதலர் தின கவிதை - பிப்ரவரி - 14

காதலர் தினம்
காதலர் தின கவிதை

ஆரம்பம் முடிவு விழியில் தெரியா  
ஆராய்ச்சியிலும் பிடிபடா 
காலாவதி பெயரளவிலும் இல்லா 
காலம் கடந்தும் வாழ்ந்தும் வாழ்ந்திட்ட
வாழ்ந்து கொண்டிருக்கும் காதலே!

மெதுவாய் சுகமாய் நீ என் இதயம் தொட 
என் கரமோ காதல் கவிதை தொட 
நழுவி விட்ட கவி வார்த்தைகள் 
எட்டிப் பிடித்து கரம் கொடுத்தாய்! - காதல்
கரமும் பிடித்தேன்! கவிதையும் பிடித்தேன்!

உதிக்கும் சூரியனும் மலரும் நிலவும் 
புரியாத வார்த்தைகள் தினம் சொல்லும் - காதலே
என் விழி நோக்கி விளக்கவுரை சொல்வாய்
கண்டதும் புரியும்,  காதல் புரியாது - இருந்தும்
காதலிக்க தகுதி உன்னால் பெற்றேன் !

எத்திசை தேடினும் நிலவாய் காதலி முகம்
நேர் எதிரே எதிரொலி எதிரொளியாய்
காதலே ! எல்லாமே உன் மாய ஜாலம்!
காதல் என்றால் சும்மாவா ? உலகமே குலுங்கும்!
வான் புவி எத்திசை நோக்கினும் காதலே!

வாழ்க காதல் ! வளர்க காதலர்கள்!

காதலர் தினத்துக்கான இன்னும் ஓர் கவிதை படிக்க லிங்கை கிளிக் செய்யவும்...





குடியரசு தின கவிதை | Kudiyarsu thina Kavithai

Kudiyarsu thinam
Kudiyarsu thina kavithai


இடைவெளி இல்லா காற்றாய் 
பாரதம் எங்கும் சமத்துவம் தொடர 
நகருகின்ற தனி ஊசலாய் 
சம உரிமை தொடர்ந்து நீடிக்க 
காலம் காட்டும் கடிகாரமாய் 
அனைவருக்கும் ஒரே சட்டம்!


அன்று முதல் இன்று வரை 
முடிவை எட்டா தீப ஒளியாய் 
வேற்றுமையில் ஒற்றுமை 
நம்மோடும் நம் உணர்வோடும் 
தினமும் பயணம் செய்ய 
வழி வகுத்த அரசியல் அமைப்போடு 
அனைவரும் பயணிப்போம்!

இனிய குடியரசு தின நல் வாழ்த்துக்கள்!







பொங்கல் கவிதைகள் | pongal festival

pongal kavithai
பொங்கல் கவிதை


காலைக் கதிரவன் கண்விழித்து 
கதிர்களை பூமிதனில் உடுத்தி 
மங்கலமாய் பூமியை மின்னச் செய்து 
எட்டிப் பார்த்த விழியில் ஏமாற்றமில்லை!

நாட்காட்டி அறிவுறுத்திய நல்ல நேரம் 
மதம் கொண்ட சாஸ்திரங்கள் 
விழி அறிந்த கடவுளாய் கதிரவன் 
ஒடுங்கிக் கொண்ட பகுத்தறிவுகள்!

ஆங்காங்கே சிறுவர்கள் ஓட்டம் 
வேரிழந்த தித்திக்கும் கரும்புகள் 
நினைவிழந்த மஞ்சள் செடிகள் 
உயிர் கொண்ட அதிசயங்கள்!

எங்கும் தேடியும் கிடைக்கவில்லை 
காணவில்லை அறிவிப்பு கொடுக்கலாமா?
எங்கே சென்று தேடுவேன் ?
எளிதாய் தென்படும் பொங்கல் செடியை!

சகல வித காய் கறிகள் 
வானம் நோக்கி வாய் பிளந்த தேங்காய்
சாணத்திற்கும் இடம் உண்டு
அடைக்கலம் கொடுத்த வாழை இழை!

மூன்று கல் நாற்காலியில் 
அமர்ந்து விட்ட மண் பானை 
ஓய்வு அறியா கரங்களால் 
ஓய்ந்து விடாத தீ சுவலைகள்!

உழைத்து விட்ட இரு கரங்கள் 
அதன் பலனாய் அதனுள் அரிசிகள் 
வேண்டுமென்றே கரம் கவிழ 
தடுமாறி விழுந்தன அரிசிகள்!

சுட்டு விடும் தீயிலும் மவுனமாய் மண்பானை 
கொதிக்கும் நீரில் துள்ளிய அரிசிகள் 
தூண்டில் போட்ட அகப் பையில் 
நழுவுகின்ற அரிசிகள்!

இன்னும் சற்று நேரம் தான் 
பொங்கல் பொங்கி விடும் 
வானிலை போன்ற பொங்கல் நிலை 
கணிப்பு சொன்ன இரு வரி இதழ்கள் !

வானிலை பலித்தாயிற்று 
இல்லை இல்லை - பொங்கிய நுரையில் 
பொங்கல் நிலை பலித்தாயிற்று 
பொங்கலோ பொங்கல் !

அனைவருக்கும் இனிய பொங்கல் நல் வாழ்த்துக்கள்  !
















இழப்பில் மகிழ்ச்சி

நழுவிய சிகரெட்
நழுவிய சிகரெட் 

விரல் நழுவிய சிகரெட் 
விரக்தியில் விழிகள் 
மகிழ்ச்சியில் நுரையீரல்!







tamil christmas songs | தமிழ் கிறிஸ்துமஸ் பாடல்

Christmas
Tamil Christmas song

அகரத்தின் அகரமே, இயேசுவே
உலக அகரத்தில் நீ அகரமே!

இதழ் படிக்கும் பைபிளிற்கு நீயே அகரம்
படித்து உணரும் இதயத்திற்கும் நீயே அகரம்
நகரும் உலகிற்கு உந்தன் ஒளியே அகரம் - (2)
தடம் பதிக்க வரும் எல்லா கருவுக்கும் நீ அகரம் 
அகரமே, அகரமே, நீயே அகரமே! (2)

உருகும் அன்புக்கு உலகில் நீயே அகரம்
உருவாகும் அன்புக்கும் நீதான் என்றும் அகரம்
உன்னதங்கள் எல்லாவற்றிலும் நீதான் அகரம் 
அதை காத்திட துடிப்பதில் நீதான் அகரம் - (2)
அகரமே, அகரமே, நீயே அகரமே! (2) இதழ் படிக்கும்

தாய் தேற்றும் அன்புக்கு உந்தன் அருளே அகரம்
தவமாய் தந்தை அருளும் வலிமைக்கு நீயே அகரம் 
குதூகலமாய் குடும்பம் காரணம் நீதான் அகரம் 
உன் அகரத்தின் துணையாய் உன்னோடுதானே என் அகரம் - (2)
அகரமே, அகரமே, நீயே அகரமே! (2) இதழ் படிக்கும்









Birthday kavithai in tamil | காதலிக்கு பிறந்த நாள் வாழ்த்து

birthday
birthday kavithai in tamil


பூமியில் பிறந்து
நிலவில் மோதி
எதிரொலித்த - உன்
பிறந்த நாள் வாழ்த்துகளில்
என் வாழ்த்தும் ஒன்று !
அதுவும் முதன்மையான ஒன்று!







காதலை அறிந்திடு

Understanding love
Kaathalai Arinthidu

நேசித்தது மெய் என்றால் 
உதடுகள் மட்டும் அல்ல 
உள்ளமும் சொல்லும்!
எங்கிருந்தாலும் வாழ்க !

காலங்கள் மாறும் 
காதல் மாறுவதில்லை 
இரண்டையும் மறுப்பதிற்கில்லை
இதை புரிவதில் தவறில்லை!

மலர் தொட்ட தேகங்களை 
தென்றல் உரசிய தேகங்களை 
கவிதையால் திட்டி 
காதலை தீட்டிய காலம் அது!

கத்தியும் அமிலமும் 
கரம் கோர்த்துக் கொண்டு 
கவி கொடுத்த தேகத்தை 
கந்தலாய் கிழிப்பது ஏனோ ?

காதலை இழந்தாலும் - அதன் 
நினைவையே உணவாய் உண்டு 
நாட்காட்டி காலத்தை 
நகரச் செய்த காலம் அது!

காதலை உணர்ந்து இருந்தால் 
இதயம் இழப்பை ஈடு கட்டும்
நாட்கள் மெதுவாய் நகர 
இழப்பீடு மெதுவாய் கரம் எட்டும்!

எழுதிய கவிதை எல்லாம் 
நிலவில் மோதி எதிரொளியாய் 
பூமியில் மோத செய்த காதல் 
கருப்பு வெள்ளை கால காதலோ ?

வாழ்ந்த காதலை இதயத்தில் வை 
வாழாத காதலை நினைவில் வை 
உண்மை காதலில் எல்லாம் சாத்தியம் 
இது காதல் மேல் சத்தியம்!











கட்டாய மின் தடை

Power
Minthadai

பூமிக்கும் வானுக்கும் 
கட்டாய மின் தடை 
அமாவாசை நாளில்! 

பைத்தியக்காரன்

Paithiyam
Paithiyakaaran Kavithai


பாதங்கள் வகுத்த வழியோடு
வலிக்காமல் பயணித்து
உடல் சொல்லி அமர்வது என் வழக்கம்!

சில நேரம் காதல் கொண்ட வாழ்க்கை
சில நேரம் உதறிய உறவுகள் - என்னை 
தனிமையில் உலவ வைக்கிறது!

சில நேரங்களில் சாப்பாடு பிச்சையாக 
சில நேரங்களில் தானமாக 
சில நேரம் விதி உடன் வருவதில்லை!

உலகத்துக்கு என்னை பிடிக்கவில்லை 
எனக்கும் உலகம் புடிக்கவில்லை 
பூமிக்கு தத்துப் பிள்ளை - ஆதலால் 
விட்டு வைத்திருக்கிறது!

அழகை மயக்கும் ரோஜாவும் தெரியும் 
பகையை முடிக்கும் கூர்முனை கத்தியும் தெரியும் 
காதலும் பகையும் தெரிவதில்லை!

இரவில் தாய் மடி தேடி அலைந்தேன்
தேடலில் எதுவும் எட்டவில்லை 
சாலையோர மேடையே இறுதியில் தாய் மடியாய்!

நான் உளறுவது பிற விழிகளுக்கு தெரியும் 
நான் அழுவது எனது விழியில் புலப்படாது 
பைத்திய மனஙகள் மனதுக்குள் அழுகிறது!

பனியும் வெயிலும் பாடம் நடத்தின 
கிழிந்து போன என் கந்தல் துணிக்கு 
எந்த பாடமும் விளங்கவில்லை!

கண்ணீர் வந்தே தேய்பிறையானேன்
மதிப்பில்லா என் கண்ணீருக்கு
வளர்பிறை என்ன தேய்பிறை என்ன ?

எல்லை என்று சொல்வது எதிலும் உண்டு 
எண்ணில் அந்த எல்லையை தேடினேன் 
எட்டாத என் எல்லையை என்னவென்று சொல்ல !

வயிறு பசித்தால் சாப்பாடு 
தாகம் எடுத்தால் தண்ணீர் 
பஞ்சத்திற்கு வளைந்தது என் உடல்!

இதுவும் கடந்து போகும் என்ற 
பொருந்தாத வார்த்தையுடன் அழுகிறேன் 
கடைசிவரை பைத்தியக்காரனாய்!












ரசிகர்கள் அல்ல வெறியர்கள்

Cinema
Cinema Veriyarkal


சினிமா என்றால் பொழுதுபோக்கு 
மறந்து விட்டது பல பேருக்கு 
சிந்தனை எல்லாம் மழுங்கி இருக்கு 
விழிக்காத மூளை மயக்கத்தில் இருக்கு!

நடித்தவன் உச்சியில் இருப்பான்  
ரசித்தவன் எங்கே இருப்பான் 
ரசித்த போதை தெளிந்து விடும் 
வெறி கொண்ட போதை கூடி விடும்!

முதல் முறை திரை நோக்க 
சில நூறு ரூபாய்கள் 
இரண்டாம் முறை திரை நோக்க 
சேமிப்பதில் அரை குறைகள்!

நடிகனின் முகத்தில் முகத்திரை - அதை 
அறியாத மனதில் மனத்திரை 
முகத்திரை விலகி விடும் 
மனத்திரை ஒட்டி விடும்!

அரசியலுக்கு சினிமா முதல் படி  
ரசிகனுக்கு அதுவே கடைசி படி 
இனி இங்கு இல்லை வேறு படி 
எப்படி வாழ்வது முறைப்படி!

திரை வடிவில் மனம் கெட்டான்
இனி எதன் வடிவில் அதை மீட்பான் 
மனமும் திரையும் ஒன்றல்ல 
மனம் முன் திரை பெரிதல்ல!

அஜித்தும் நடிகரே விஜயும் நடிகரே
ரசிகன் இருவரையும் ரசிக்கிறான் 
வெறியன் ஒருவரை துதி பாடுகிறான் 
இவர்கள் ரசிகர்களே அல்ல வெறியர்கள்!










சிறகுகளுக்காய் ஓர் ஏக்கம்

Siraku
Sirkukal



சிறகுகள் கிடைத்து 
வானம் பக்கமாகும்
அந்த நாள் எந்த நாளோ ?

கிடைத்தே தீரும்

Kidaithal
Kidaithe Theerum

உதவி இல்லாத சூழல் 
ஒரு பொழுதும் நேராது 
நம்பிக்கை இல்லாத சூழல் 
ஒரு பொழுதும் வாராது!

செய்து விட்ட புண்ணியங்கள் 
பலன் தராமல் போவது இல்லை
செய்து விட்ட பாவங்கள் 
கை விட்டுப் போவது இல்லை!

கைக்கு எட்டாத காதலியை நினைத்து
எழுதிய கவிதைகள் பலம் பெறும்!
எட்டாத வெற்றியை தொட்டு விட
எட்டும் முயற்சிகள் தோற்பதில்லை!

விழி கசிந்த கண்ணீரில்
மெய்மை சுரந்திருப்பின்
வருங்காலம் பதில் சொல்லும்!
காலம் நீளலாம், பொய்மை நீளாது!

நிமிர்ந்து நிற்பது தைரியம் என்று
தோள் நிமிர்த்தி சொல்பவர்
வளைந்து கொடுப்பது பலகீனம் என்று
தவறிய சொல் வழி நடப்பர்!

அறிவாளி என்று தன்னை  உணர்ந்தால்
முட்டாளாய் முன்னோக்கி செல்வாய்
விதியானாலோ அறிவினாலோ
கிடைப்பவை நிச்சயம் கிடைத்தே தீரும்!








காட்சிப் பிழை

Tharai
Kaachip Pilai


சரி செய்ய முடியாத 
காட்சிப் பிழை 
தரை தொடும் வானம்!




கிருஷ்ண ஜெயந்தி கவிதை

Krishnar
Krishna Jeyanthi Kavithai


கீதையின் குருவாய்
வாழ்க்கையின் வழி காட்டியாய்
எண்ணங்களின் கண்ணாடியாய்!

புல்லாங்குழல் காற்றில் இசையாய் 
குறும்புகளில் ஓர் கதையாய்
மயிலிறகில் ஓர் கண்ணனாய்!

மேகத்தில் மறையும் நிலவாய்
வாடா நட்சத்திர பூவாய்  
வெண்ணெயையும் தாண்டிய வெண்மையாய்!

உடலைத் தாண்டிய ஆன்மாவாய் 
உடலைத் தாண்டிய வீரமாய்
உன் நாடகத்தில் நானும் ஒருவனாய்!

நீல நிறத்தில் ஓர் குழந்தையாய் 
அதர்மத்திற்கு எதிராய் தர்மமாய் 
கிருஷ்ண வேடமிட்ட மழலையாய்!

ஆயர்பாடியில் ஓர் கண்ணனாய்
லீலைகளில் ராச லீலையாய்
காதலை எல்லாம் ஆட்கொண்டவனாய்!

மரணம் எட்டாத என் ஆன்மாவாய் 
கிருஷ்ண ஜெயந்தி அவதாரமாய்
வெண்மை இதயங்களோடு வாழ்வாய்!

ஸ்ரீ ராம ஜெயம்!










அழகு மாறா விழிகள் | Alaku maara vilizhikal

Alaku
Alaku vilikal


அறிவியல் ஆர்வம் இல்லை 
ஆர்வம் இருந்திருந்தால் 
என்றோ சொல்லியிருப்பேன் 
கருப்பு வானவில் உன் புருவம் என்று!

விழிகளின் கவசமாய் இமை முடிகள் 
உன் விழி கூர் ஆயுதமாய் இருக்க 
எதிர் பார்வை சுடத் துடித்தேன்
என் கவசங்களோ வெற்று முடிகளாய்!

இயல்பிலே விழியோரம் கண்மை கொண்டு 
அழகு தேவதையாய் பூமியில் பிறந்தவள்
கண்மைக்கு உன் விழியோரம் வேலை இல்லை 
இயல்பாய் வசியமாய் வசிய மை கூடுதல் சிறப்பு!

புவி ஈர்ப்பு விசையையும் ஏமாற்றி 
உன் விழி ஈர்ப்பு விசையால் 
புவியில் விழுந்தது நிலவு என்று 
அறிவியலும் வரலாறும் நாளை மாறும்!

என்றும் அழகு மாறா உன் விழிகளுக்கு சமர்ப்பணம்!







பறிக்கப்படுகின்ற முத்தங்கள் | Parikapadukindra Muthankal

Mutham
Thaaiku Mutham


முகத்தில் துளிர் விட்ட 
தாடி என்ற ஒற்றை காரணத்தினால் 
இங்கே பல முத்தங்கள் 
பறிக்கப்படுகின்றன!
தந்தையிடம் இருந்து தாய்க்கு! 




கலைஞர் கருணாநிதி கண்ணீர் அஞ்சலி | Karunaanithi Anjali

Anjali
Karunanith



ஏதோ ஒரு புள்ளியில் 
உன்னால் ஒரு முதல் பட்டதாரி!

ஏதோ ஒரு புள்ளியில் 
உன்னால் ஒரு இலவச மின்சார விவசாயி!

ஏதோ ஒரு புள்ளியில் 
உன்னால் ஒரு வள்ளுவன் சிலை!

ஏதோ ஒரு புள்ளியில் 
உன்னால் ஒரு மாற்றுத் திறனாளி!

ஏதோ ஒரு புள்ளியில் 
உன்னால் ஒரு திருநங்கை!

இன்னும் எத்தனை புள்ளிகளோ 
அத்தனை புள்ளிகளும் முத்தமிடுகிறது
உன் கையொப்பம் இட்ட எழுதுகோலில்!

எழுதுகோலுக்கு மரணம் இருக்கலாம் 
எழுதிய எழுத்துக்களுக்கு மரணம் இல்லை!

எனது இனிய உடன் பிறப்புகளே!










தலைக் கவசம் | Thalai kavasam

helmet
Thalai Kavasam kavithai


உயிரைக் காக்க ஓர் கடின உழைப்பு
கொட்டுகிறது வியர்வைத் துளிகள் 
தலைக் கவசம் உள்ளே!

காந்தக் கண்ணழகி


kannalaki
Kaantha Kannalaki


காந்தமாய் பிறர் பார்வையை 
தன்னுள் இழுத்துவிட்டு 
கண் திருஷ்டி என்று சொல்லி 
ஊரைத் திட்டுகிறாள்!
காந்தக் கண்ணழகி ஒருத்தி!






நண்பர்கள் தின கவிதை | Nanbarkal thina kavithai


nanbarkal
Friendship day kavithai


உறவுகள் பலவிதம் என்று 
உலகம் விதைத்து இருக்கிறது 
நட்பு என்ற விதை ஒன்று 
இன்று ஆலமரமாய் வளர்ந்திருக்கிறது!

ஒருமையும் (காதல்) பிடிப்பதில்லை 
தனிமையும் (ஒரு தலை காதல்) பிடிப்பதில்லை 
தோழர்கள் (நண்பர்கள் ) என்ற பன்மை 
நட்புக்கு (உயிருக்கு ) பிடித்திருக்கிறது!

காதலை சல்லடை இட்டால் 
வயதைச் சொல்லும் 
நட்பை சல்லடை இட்டால் 
உயிரை உணர்வை சொல்லும்!

விவரம் அறியும் முன் 
நட்பு பூத்து விடுகிறது!
காதல் பிறக்க ஹார்மோன்கள் தேவை 
நட்பு பிறக்க உயிரே தேவை!

பதில் இல்லா வினாக்கள் 
நட்பில் எழுவதில்லை 
நட்பான உறவுகள் பிரிவதில்லை
வேரிட்ட மரங்கள் நகர்வதில்லை! 

குழந்தையின் கிறுக்கல்கள்தான் 
ஆனாலும் புரிந்து விடுகிறது 
நட்பாக கிறுக்கிப் பார் 
ஆஹா! கிறுக்கல் எல்லாம் கவிகள்!

இரவின் இடைவெளி பகலா 
பகலின் இடைவெளி  இரவா
உயிரின் இடைவெளி நட்பா 
நட்பின் இடைவெளி உயிரா!

மயில் இறகில் அழகு விழிகள் 
குயில் குரலில் ஓர் சங்கீதம் 
தூணிலும் துரும்பிலும் இறைவன் 
துடிக்கும் இதயத்தினில் ஓர் நட்பு!

எனது இனிய தோழர்கள் மற்றும் தோழிகளுக்கு நண்பர்கள் தின நல்வாழ்த்துக்கள்!







காதல் கனி | Kaathal kani


kani
Kaathal Kani


எட்டாத கனி அது காதல் என்று 
சிலர் பறிக்க முயற்சி செய்கிறார்கள் 
எட்ட முடியவில்லை ஆதலால் 
சிலருக்குப் புளித்து விடுகிறது!

எட்டிப் பிடித்ததாய் உணர்ந்தவன் 
முழுவதும் ருசிக்கும் முன் 
தவறான முடிவெடுத்து விடுகிறான் 
இதற்கா ஆசைப் பட்டோம் என்கிறான்!

எட்டிப் பிடிக்கவும் முடியவில்லை 
எட்டிப் பிடிக்காமல் இருக்கவும் முடியவில்லை 
இரண்டிற்கும் இடைப்பட்ட சம நிலை 
தினமும் ருசிக்கிறான் காதல் கனியை !








சுதந்திரம் கவிதை | Suthanthiram Kavithai

Suthanthiram
Suthanthiram Kavithai


என் அன்னை சுவாசித்தாள்
சுதந்திரக் காற்று - ஆதலால்
கருவறையில் சுவாசித்துக் கொண்டேன் 
நானும் சுதந்திரக் காற்றை!

மறைமுக சிறகுகள் கொண்டு
கம்பீரமாய் பறக்கிறது தேசிய கோடி
சிறகு படைத்த பிரம்மாக்கள் 
சுதந்திர போராட்ட வீரர்கள்!

தேசிய கோடியில் சில நிறமுண்டு 
நிறத்தினில் சில காரணம் உண்டு 
காரணத்தில் சில குருதி உண்டு 
குருதியில் ஒரு வரலாறு உண்டு!

வீதியெங்கும் சுதந்திரக் காற்று 
வானெங்கும் சுதந்திர மேகங்கள் 
இதழில் சுதந்திர வார்த்தைகள் 
எங்கும் சுதந்திரம் எதிலும் சுதந்திரம்!

அடைக்கலம் எங்கும் இல்லை 
அடிமைகளாய் எங்கும் இல்லை 
அடிமைகளாய் வாழ்ந்தவர்கள் 
அறுத்துவிட்ட சங்கிலியால்!

நிசப்தம் வேண்டாம் 
சுதந்திர வீரர்களின்
கல்லறை முன்னே 
உரக்கச் சொல்லலாம் !
வந்தே மாதரம்! வந்தே மாதரம்!