நீர் தேடி அலையும்
பறவையின் மனக் குமுறல் இதோ...

வீதி  உலா நானும் வருகிறேன்

வானின் வழியாக
தாகம் தணிக்க
நீர் தேடி அலைகிறேன்...
கானல் நீரைக் கண்டு
ஏமாற்றம் அடைகிறேன்.

வீதி  உலா நானும் வருகிறேன்...

கண்ணுக்கு எட்டிய தூரம் வரை
பசுமை தெரியவில்லை.
பண முதலைகளின்
நில அளவுக் கல்.
சாரை சாரையாய்.

வீதி  உலா நானும் வருகிறேன்...

பறி போன விளை நிலம் அது.
வில்லங்கச் சான்றிதழ் கேட்டு
வீதியில் போராடுகிறான்
விவசாயி ஒருவன்.
நேற்று வரை
என் தாகம் தணித்த
கடவுள் அவன்.

வீதி  உலா நானும் வருகிறேன்...

இதயத் துடிப்பு அதிகமாக
இளைப்பார இடம் தேடுகிறேன்.
புல்வெளி கூட இல்லாத இடத்தில்
மரங்களை நான் எங்கே தேடுவது ?

வீதி  உலா நானும் வருகிறேன்...

எனது சிறகுகள்
வலிக்க மட்டுமா செய்கிறது
கனக்கவும் செய்கிறது.
இருந்தாலும் தொடர்கிறேன்
தாகம் தணிக்கும் நீர் தேடி.

வீதி  உலா நானும் வருகிறேன்...

உடலில் உயிர் இருக்க வேண்டி
உங்கள் வீட்டு மாடி தேடி வருகிறேன்..
குவளையில் தண்ணீர் வைத்திடு தாயே!

எனது வீதி உலாவை
இனிதாய் நிறைவு செய் தாயே!!!.

4 comments:

  1. என்ன செய்ய வேண்டும் என்பதை அருமையாக சொல்லி விட்டீர்கள்... பாராட்டுக்கள்...

    தொடர வாழ்த்துக்கள்...

    ReplyDelete
  2. பறவைகள் எங்கள் வீட்டு மொட்டை மாடி தேடி வருகையில்
    நான் மிகவும் ஆனந்தம் அடைகிறேன்...
    பிறந்த பலனை அடைந்தது போல் உணர்கிறேன்....

    நான் குவளையில் தண்ணீர் ஊற்றிக் கொண்டு இருக்கிறேன். பறவைகள் இரண்டடி தூர தொலைவில் என் அருகே சுவரில் வரிசையாக அமர்கிறது. எதையோ பெரிதாக சாதித்து போல உணர்கிறேன்...

    வெயில் காலம் வந்து விட்டாலே பறவைகள் மிகவும் கஷ்டப்படுகிறது. முடிந்த வரை தெரிந்த நண்பர்களிடம் விழிப்புணர்வு ஏற்படுத்துவோம்.

    மிக்க நன்றி!

    ReplyDelete

 
Top